KUSINA WOKYOH & MOK GHIMA

Assalamualaikum,

"Ai, mako tersebutlah, seekor makhluk ye tingga dale hute cere bukit buka payo lemboh tanoh tinggi batu besar! Makhluk bergela Mok ghima seje kilat sekolong bomi, tidok bertangguh genyehke taring sengihke gigi menjelirke lidoh eleng-eleng panjelah lego, nok tekoke pulok atah palo Kusina Wokyoh, blahhhh,ish!"

"Hehehe, sajo aku ambik ayat woye kulik wak naik semangat, hehehe. Lamo weh tok denga woye kulik 'live'. Ngelah aku denga maso duk kapung mulo hok Sopi main di Bukit Payong. Maso tu ado acaro gapo aku tok ingat. Tapi pete tu ado persembahe Megat Nordin pah male tu woye kulik. Male tu saing aku Abe Nor jong main suna dale persembahe. Lamo tok jupo Abe Nor. Aku dengar dio jadi jong ngaja di ASK. Hem, wak ko rindu ko woye kuliklah mako aku pun lukih gambar ni kesoh Wokyoh nga Said gi cari susu ghima. Wokyoh bokok pun tapi bining come-come, hehehe."

NAMO GHIMA

Assalamualaikum,

"Tok tahu maghi duano tibo-tibo jah nyetok angin nok lukih gambar ghima pulok. Sebenarnyo aku lukih sekoda nok meningkatke kemahire aku dale dunio melukih ni. Belaja lukih gambar binate pulok. Aku duk mikir soghe ghanolah otai-otai melukih tu dio lukih gamba ghima serupo terus nga ghima hidup. Kade-kade come lebih pado hok hidup, hehehe. Jadi aku 'try' lukih seko nok tengok napok ko dok serupo ghima. Lukihlah aku belete kale sekali nok bulih ko siap seko. Pah ghoba-ghoba. Payoh weh jenih tok panda lukih nih. Bilo sapa tahap aku ghaso puah hati, mako terhasillah seko hok oghe duk sebut namo ghima. Napok ado meh doh pado pandange aku tapi pandange tepi bulihlah. Kalu hok depe belum tentu lagi jadi. Apo pun aku puah hati doh sebab matlamat aku tercapai nok lukih ghima walaupun napok serupo kucing, hehehe"

KETENANGAN

Assalamualaikum

"Kade-kade aku ado jugok maghi tok tene. Banyoklah sebabnyo, mace-mace alase. Jadi selain pado zikir dale hati aku beghehi jugok tengok pemandange hok bulih buat aku tene. Tapi nok tengok pemandenge come payoh kalu tok duk kapung. Mako inisiatihnyo aku lukihlah gambar di atas sebagai caro aku nok teneke perasaan hok serabut. Jadi tehelah sikit woh saru tu, hehehe"

JERANGAU JABOR

Assalamualaikum,

"Lamo sungguh tok nitah dale blog ni. Wak lolok sibuk konon-kononnyo. Baru ni aku balik kapung jadi aku lalu sokmolah ikut jale Jerangau-Jabor. Sebenarnyo pemandange sepanje perjalane meme lawa. Beraso suko, tene jah bilo tengok pokok-pokok, bukit, kelapo sawit, awe balik bukit, tanoh lade. Aduh, meme sempurno sengoti ciptaan Allah. Gambar ni aku lukih sebenarnyo lamo sangat doh aku cito-cito nok lukih tapi mungkin disebabke kemahire aku tok serupo loning mako aku 'hold' dulu. Alhamdulillah nga izin Allah bulih jugok aku lukih bele-bele ngayak pun, jadilah. Paling payoh nok lukih jale tulah. Menengung aku mulo-mulo lagu mano nok suruh napok jale. Payoh sangat aku wak belok sikit gak pah aku tamboh hok mano ado dale gambar tu. Mako siaplah walaupun tok come mano, hehehe"

AKU LEMAS

Assalamualaikum,

"Tibo-tibo aku maghi teringak ko kapung nok-nok parit depe rumoh. Sedak sungguh nok mandi tu hungga jauh lagi pahtu pecak slipa ikut de jah pah 'blum' dale parit. Hahaha meme suko bulih wak lagu tu. Sek kapung aku panggil naze lagu tu. Parit depe rumoh tu meme banyok kenangan. Hok paling aku ingat aku mulo-mulo panda berenang. Ceritonyo aku nga muloh mok gilah parit tu buat pertamo kalinyo. Mok ajok sebab mok aku basuh kain baju di parit. Mudoh kato mok lepah basuh gak bulih kicoh selalu. So lagi lepah basuh so lighoh bulih mandi selalu. Jadi aku pun gilah. Aku ni punyolah daghak maso tu aku tengok budok-budok alik hilir terjun bodo gitu jah, aku pun nok terjun gheteklah kononnyo 'pro' doh. Meme 'pro', 'pro'sok hehehe."

"Terjun punyo terjun kaba-kaba aku tegele. Aku buko mato napok air jah kelabu. Beraso sesok nafas duk dale air. Kaki aku ni jadi kreng tokleh nok geghok. Meme aku lemas maso tu. Air penuh doh masuk dale hidung. Tengoh duk kele-kabut tu aku beraso ado tange pege baju aku di tekok. Maso tu aku peje mato sebab pedih doh mato beghaso. Bilo aku buko mato tengok mok hok pege baju aku. Mok heghek aku sekali jah sapa timbul semula. Meme mok tengoh gagoh lagi maso tu. Aku pun naiklah atah geghe tempat mok duk basuh."

"Bilo aku selamat aku pun sengih ko mok tapi tok seko bulih nyekeh sebutir pasal wak nyusoh ko dio tarik aku. Hahaha meme aku suko maso tu. Mok pun wak khepeklah. Dio kato 'agah nok naze,beghene pun tok panda. Lemah pulok aku tok tulong doh'. Hahaha meme aku insaf sungguh maso tu. Lepah pado tulah aku panda berenang sapa loning sebab mok kato dio tokse tulong doh kalu aku lemas pulok, hehehe."

ULAT BULU DAH NAIK DAUN

Assalamualaikum,

"Lamo tok ngepuh dale ni. Jadi hari ni ado lue bulihlah ngepuh. Gambar ni ulat bulu duk ghukah pohong kayu. Tujuan de pembelajare ini takdok gapo sajo lukih disebabke aku nok 'try' lukih figura binate pulok. Jadi aku lukih nga makhluk kecik-kecik dulu. Tok tahu jadi ko dok tapi aku puah hatilah kughe-kughe kalu oghe tengok oghe kena ni gambar ulat bulu. Sebut ulat bulu aku sokmo teringak Ajih nga Sudin dale Pendekar Bujang Lapok. Dio kato 'ulat bulu dah naik daun, apa boleh buat nasib badan', hahaha selok suko tengok cerito ni, hehehe."

OH CIK JIMI

Assalamualaikum,

"Cik Jimi, seoghe anggota polis jugok merangkap jurulatih pasukan kadet polis SMK Putra jame aku dulu. Diolah hok banyok mendidik de mengajar aku nga saing-saing aku untuk menjadi anggota kadet polis sejati. Hasilnya pasukan kadet polis sekoloh aku berjayo hinggo ko peringkat kebangsaan de muncul johan tigo tahun berturut-turut. Jadi sebagai saloh satu caro aku menghargai beliau mako aku pun lukihlah gambar ni. Cik Jimi loning dale Pasukan Gerakan Am PDRM de kali terakhir aku jupo dio jame lepah tingkatan 6 maso SMK Putra wak program di Lato Tembakoh. De jugok aku nyanyi lagu dikir sebutir duo male tu, hehehe."

BERUK DAN TUANNYA

Assalamualaikum,

"Beruk naik nyo. Itulah ungkapan paling sesuai nga gambar ni. Aku lukih gambar ni semato-mato nok tukar tema lukise aku jah. Kade-kade puah jugok duk lukih tema tulo jah. Jaghe-jaghe tukar tema sedak jugok. Jadi tok banyok hok aku bulih ghoyak cumo bele-bele lukih ni aku teringak ko kapung. Tu ya 'feeling' tu ado maso lukih gambar ni. Mulo-mulo aku nok lukih beruk sajo jah tapi aku raso keno ado tuan baru bulih nok suruh beruk pilih hok mudo, hehehe."

AKU & JIHAD

Assalamualaikum,

"Alhamdulillah, setelah lamo senyap, aku kembali lagi nok ngapo dale blog ni. Sibuklah baru ni nga bekwoh sano sini. Tu pun banyok hok tokde nok gi."

"Jadi gambar ni aku lukih atah dasar semangak capo nga naik angin lepas tengok vidio pejuang Islam hok mati syahid di Pergunungan Chechen. Maghi belako lepah tengok. Puok dio meme semangat tinggi sungguh. Meme tok takut mati. Latihe aku tengok meme mantap. Kalu nga latihe aku jame rekrut mulo tokleh nok pelago. 'Time' berlatih berlatih. 'Time' semaye puok dio semaye, jemooh pulok. Baguh sungguh sabik tu puok dio tok takut mati. Aku duk mikir soghe bulih ko aku setagho tu. Huh, gelak gambar duk beraso."

"Kih semangat dooh lalu aku pun lukih gambar ni pakai loreng ATM tapi guno pede. 'Background' tu aku baye duk atah gunung. Oghe dale gambar tu senyum tu maksudnyo akulah tu koya jadi pejuang, hehehe."

ALAM JIN@BUNIAN

Assalamualaikum,

"Gambar ni ghama oghe tok pehe sebab io dilukih. Tapi sebenarnyo gambar ni adolah hasil imaginasi aku terhadap alam bunian atau alam jin yang berkait rapat nga hidup kito. Sebab kito keno ingat selain kito makhkluk jin ni jugok ado nga kito samo-samo menumpe di bumi Allah ni. Jadi lepah aku baco buku Tamar Jalis aku pun 'imagine' sikit pah aku lukih gambar ni."

"Ok, kole dale gambar tu aku baye biasonyo makhluk jin ni kalu hok tino beghehi main di kole mako aku lukih kole. Suasano bercahayo tu aku lukih sempade antaro dunio kito nga dunio bunian. Pah guo sebeloh kane tu aku lukih sebagai tempat tinggal makhluk jin atau bunian ni. Pahtu pulok bayenge hite tu aku lukih gambare bahawosonyo alam jin ni adolah termasuk alam ghaib. Jadi hanyo oghe-oghe yang diizinkan Allah jah hok bulih tengok alam ni. Kalu serupo aku ni meme gelak gambarlah nok tengok doso banyok dooh, hehehe."

DIA SOLEHAH

Assalamualaikum,

"Gambar wanita solehah pulok. Aku lukih gambar ni sebab ado satu hari aku nga Dauh Pasir Mas gi deghak KIAS mugo Dauh ngaji situ. Jadi aku duk tengok ghamalah awek-awek paka tudung labuh. Jadi aku nga Dauh apo lagi berceritolah hal budok-budok solehah ni. Dauh kato dio ni bulih ko dok bining lagu ni seksok. Aku suko soghelah dio sedih sokmo mengenangkan nasib dirinyo hok tok male tu. Aku katolah 'Demo tu milih sangat, padahal ghama hok kene ko demo'. Dio pelik bakpo aku kato gitu. Aku jawaklah 'Demo jange milih baru mudoh jupo'. Dio sengih jah, hehehe."

AKU, GETAH & KUBUR

Assalamualaikum,

"Kalu duk kapung aku kebanyoke oghe kapung khijo nane padi nga noreh getoh. Jadi aku terbaye maso sekoloh mulo. Pagi-pagi aku gatih basikal tuo kala kuning nok gi sekoloh lalu kut jale kubur. Sebab jale tu panggil jale kubur mugo kalu lalu jale tu jupo kubur dekat nga balasoh. Pah balasoh nga kawase kubur tu ngadap pulok kawase getoh pak oghe kapung noreh. Jadi gambar hok aku lukih ni gambar lade getoh beghadak nga kubur tulah. Lade getoh ni sejaroh dio lamo sengoti. Jak pado jame muloh mok lagi, sebelum tu pun ado doh. Mace-mace cerito bulih dengar kalu rajin cokek oghe tuo lamo pasal kawase kubur nga lade getoh ni. Kebanyokke tok nenek aku disemadike di kubur nilah termasuklah muloh mok aku ni. Kade-kade aku maghi sedih 'time' balik pun tokde nokgi ziaroh kubur tok nenek lamo-lamo. Kalu gi pun 'time' ghayo. Tu pun kalu gi, kalu dok gak jadi ghebolah kubur tok nenek. Apo pun Al-Fatihah untuk seluruh penghuni kubur Pade Baloh, semogo roh mereko dicucuri rahmat Allah Subhanahuwataa'la, amin. Aku pun kade-kade jaghe bulih balik, hehehe."

PELITA HIDUPKU

Assalamualaikum,

"Gambar pelito ni teramatlah bermakno pado aku. Wak ghano aku besa dale guno pelito ni. Kenenge nga muloh mok banyok berkaite nga pelito ni. Tido male aku tok pase lapu serupo rumoh oghe lain. Pade pase pelito jah. Kato muloh mok 'Kalu ceroh oghe duk luar jauh lagi napok kito, dio tuju maghilah rumoh kito sebak ceroh. Kalu gelap ni dio tahu tuan rumoh tido doh. Jadi dio tok maghilah'. Hahahaha, aku suko sokmo bilo teringak mok kato gitu. Dio cukup jago keselamate diri. Sabik tu aku lebih suko guno pelito pado guno cahayo lapu. Pah pulok jimat eletrik kato mok. Pitih ado bulih wak guno kok lain lagi. Hehehe, tapi loning tok tahulah pah mano pelito tu. Aku tokde nok caro duk sibuk-sibuk nok urus muloh mok ni jadi tok terpikir ko pelito. Mungkin ado nga mok-mok sedagho aku."

"Jadi loning walaupun mok takdok doh, pah pelito pun takdok jugok, pelito dale hati aku tetap ado & tetap nyalo sebelum sapa masonyo pelito tu mapuh sedighi. Pelito hidupku ni minyok dio maghi pado keimananku, sumbu dio pado pengalame & ilmuku pah tepak mege dio adolah agamoku. Dan denge izin Allah, aku tokke biar sapo-sapo pun nok hembuh pelito hidupku ni sebab aku tahu takdok pelito ni sapolah aku di dunio fana pinjame ni, hehehe."

DULU & KINI

Assalamualaikum,

"Pemandange indoh kapungku membuatke tenang hati bilo tengok. Maso ni aku ado di Kota Bharu. Lamo tok kelik kapung jadi wak ko telapo rindu, aku pun lukihlah gambar ni. Kawase hok aku guno ni dekat nga parit depe rumoh atau lebih tepat lagi kawase batah. Kade-kade aku tokleh nok ok de maghi teringak ko kapung. Hidup aku jadi tene, line kalu duk kapung. Bagi aku duk bandar ni banyok kagho wak serabut peghuk. Takdok ketenenge lasung. Ado jugok tiko-tiko maghi nok semaye pun jadi tok khusyuk mano. Amal ibadat aku pun jadi tok berapo ikhlas tok samo kalu aku duk kapung."

"Kalu duk kapung serbo-serbi aku suko. Takdok hok nok buat serabut peghuk aku. Alhamdulillah, aku suko duk kapung. Ketenenge kapung membuat aku lebih khusyuk dale beribadah. Tok tahulah aku kaba ko dok, tapi seingat aku lepah muloh mok ni takdok, payoh sengoti aku nok semaye khusyuk supo mulo. Buke aku sedih mok takdok. Tapi aku duk bimbe ko amal ibadat aku. Takdok kualiti serupo mulo. Takdok oghe hok bulih pehe aku samo supo muloh mok, hehehehe.

BEHIND ENEMY LINE

Assalamualaikum,

"Gambar ni aku lukih lepah tengok cerito 'Behind Enemy Lines'. Meme mantap cerito tu. Oleh kerano terujo tengok cerito tu mako aku pun maghi idea nok lukih ghetek askar kito di mede peghe supo aku tengok dale cerito tu. Tapi versi aku lukih ni kiro versi komik mugo idea aku tok banyok nok lukih versi karikatur."

"Dale gambar tu aku buh 3 unit dale Tentera Darat iaitu Kor Armor Diraja, Kor Perkhidmatan Am(Cawangan Angkut) & Pasukan Atur Cepat(PAC) 'Para Airbone'. Jenis senjato aku buat M16 sebab aku tok ceghak mano lagi 'design' senjato lain. Hajat nok lukih 'Styer Aug Rifle' tapi malah nok 'detail' jadi lukih mudoh-mudoh jah, hehehe."

KETUA SEKSYEN

Assalamualaikum,

"Aku teringat lagi jame dale askar mulo bilo satu hari aku masuk hute di Jajahan Kecil Lojing, Kelate. Jadinyo pasuke aku keno khemoh alah ko hute dale sikit di kawase dekat nga sungai. Mako aku maso tu selaku Ketua Seksyen jadi kenolah bagi tugah ko anok buoh. Lepah sudoh 'task briefing' aku pun gilah kawase tugah. Jadi akunyo 'duty' jadi 'sentry' pukul 2 pagi sapa 3 pagi. Aku 'sentry' untuk seksyen 2 sebab anggoto seksyen 1 nga 3 penuh doh."

"Rekah cerito tengoh 'duty' aku duk nengung tengok bule penuh maso tu. Ralik dok nengung pah lelap. Aku kaba lepah kejuk ko bunyi ghok supo keno tepuh mugo. Aku pege kemah M16 tange. Nati raso gapo namo bunyi seghuh-seghah-seghuh-seghah depe aku. Hile doh ngatuk ni aku jadi nok tahu gapo namo bunyi sakning. Aku koho-koho gi ikut bunyi tu sapa dekat aku begheti. Nati dengar gapo. Duk tok lamo bunyi sogho kato 'Skot!aku nok beghok ni,jange rapak sangat'. Hahahaha, aku meh-meh nok beguling bating ok suko. Pah aku pun balik ko 'position' aku bele-bele kerah peruk dok suko tok bunying. Pah loning aku ingat sabik tu aku lukih gambar ni, hehehe."

CAMOUFLAGE

Assalamualaikum,

"'Camouflage', tu sebenarnya motif gambar ni. Aku teringak maso dale askar mulo 'time' masuk hute keno 'makeup' dulu guno bedok nyama atau 'camoeoil' untuk penyamare. Jadi mulalah coreng situ coreng sini biar hile muko asal. Hehehe, mako aku pun lukihlah gambar ni sebagai mengimbau kenange lamo, hehehe."

"Tujuan sebenar 'camouflage' ni adolah untuk penyamare bagi askar ketiko terlibat dale operasi atau misi ketenteraan kerano faktor penyamare adolah faktor ye amat peting dale kejayaan sesuatu operasi. Ini kerano berkesannyo penyamare mako berkesanlah misi atau operasi tersebut. Tujuan nyama ni nok elok dikesan musuh bagi memastike tiadanyo halange atau ganggue maso kito dale operasi. Jugok sebagai satu taktik pertehene dale memastike keselamate diri kito mahupun kakah hok terlibak nga kito. Panje benar doh baghi ni padelah dulu takut ngaghuk ngabe pulok, hehehe."

LUKIS MAIN-MAIN

Assalamualaikum,

"Aku pun tok tahu lagu mano jadi gambar ni sebabnyo aku lukih sajo-sajo jah buke kato ado idea doh. Lebih tepak lagi lukih maing-maing. Lukih punyo lukih 'last-last' jadi gambar oghe duk dale ghok. Aku tok ceghak gapo motih oghe ni tapi aku anggaplah dio ni seoghe pendekar berdasarke betuk bade dio kasar. Mungkin jugok dio sesak dale hute sebab suasano dale gambar tu male doh."

"Kesimpulenyo meme aku sedighi tok pehe mano tujuan gambar ni, meme aku lukih bele maing-maing sengoti, hehehe"

CINTA ARJUNA

Assalamualaikum,

"Bulan purnama menjadi saksi,
 Alam dunia sebagai wali,
 Cinta Arjuna cinta yang suci,
 Hidup bersama dalam sanubari.."

"Lirik lagu dikir tu lirik lagu 'Cinta Arjuna' nyanyian Syarifah Aloyah. Jadi aku lamo tok dengar lagu ni tibo-tibo teringak. Mako aku pun mulo lukih gambar bule purnamo ni. Jadi ko dok tok tahulah."

"Gambar ni jugok gambar hok mulo-mulo aku lukih tok guno "Paint'. Aku guno 'Slimber' pulok. Bulih kato 'Slimber' ni hilirlah sikit pado 'Paint' sebab banyok kakah dio hok canggih pado 'Paint'. Lepah pado ni aku 'start' guno 'Slimber' dale kebanyoke karyo aku untuk menamboh kemahire, hehehe."

LEMBU, PARIT & POHON SSETO

Assalamualaikum,

"Gambar ni tok pasti bilo aku lukih samo ado sebelum muloh mok takdok ko atau lepah takdok doh. Meme tok ingat. Cumo hok aku pasti gamba ni dale aku dok guno 'Paint' lagi wak nukih."

"Aku ingat lagi gambar ni aku lukih lepah tengok Pokngoh Him tambak lembu dio atah batah parit dekat nga pohon sseta. Pah ado saghe burong hatu tepi tu. Pete-pete keghek aku gi locoh buoh sseta 'time' buoh banyok nga ahli kelab supo Seri, Pokmak, Tokchek, Mak Ime, Sarul, Bad, Mak Saking. Puok  ni jong ghukah aku jong make lek bowoh. Bele-bele make terjun dale parit main berambak mugo pohon sseta ni sebeloh parit, suko weh ingat 'time' nih, hehehe."

BILA AKU DIKARTUNKAN

Assalamualaikum..

Terlintas di fikiran aku lagu mano rupa aku bilo dikartunkan. Tanpo berfikir panje aku pun mulolah berkarya & hasilnya dapatlah rupo aku supo gambar bowoh ni. Alhamdulillah aku syukur dengan nikmat hok Allah buwi..

SANGAT LUCU RUPA AKU

WANITA SOLEHAH

Assalamualaikum,

"Isteri cerdik yang solehah,
 Penyejuk mata, penawar hati, penajam fikiran,
 Di rumah dia isteri di jalanan kawan,
 Di waktu kita buntu dia menunjuk jalan.."

"Lagu nilah sebab utamo aku lukih gambar wanita solehah ni. Sungguh mendale kato-kato lagu tu. Aku meme minak sengoti lagu tu. Maghi jugok sebok mikir layok ko aku nok bulih isteri solehah lagu tu, Allahu Robbi."

"Robbana Hablana Min' Azwajina Wa Zurriyyatina Qurrata A'yunin Waj'analil Muttaqina Imama, Amin."

"Lepah lukih gambar nilah aku berheni lamo jugok lukih, meme lamo adolah setahun. Mencari ilham dan idea baru konon-konon, hehehe."

GAGAH SETIA

Assalamualaikum,

"Gagah Setia! Cogankata lambang keberanian & ketaatan askar dale gambar ni khususnyo Tentera Darat. Gambar ni jugok sebagai satu latihe untuk aku belajar teknik baru iaitu 'Colour & Tone' mudoh sebut gak teknik ngalalah. Sabik tu warno dale gamba ni aku guno ceroh nga gelap. Nok bezo sesuai ko dok nga keadaan gambar ni. Alhamdulillah, aku berjayo kuasai teknik ni walaupun tok seratuh peratuh. Baik bulih sikit pado dok lasung."

"Hok paling peting aku bulih lukih loreng di baju askar tu lebih kughe nga loreng sebenar. Bulihlah tok samo pun, hehehe."

AYAT-AYAT CINTA

Assalamualaikum,

"Dale palo aku idea ni maghi sebelum aku lukih gambar ni. Gambar ni aku lukih sebab jame ni jame ceghito 'Ayat-Ayat Cinta' dok tengoh soho. Mako aku hok terpengaruh denge hasute sahabatku Dauh Pasir Mas, lalu melukih dale versi aku sedighi iaitu Cinta Di Desa(reko jah tu,hikhikhik)."

"Hok jate tu mugo oghe kapung jadi aku lukih tok tokoh sikit. Wanita tu pulok isteri solehah mako kenolah lukih solehah. Mugo dok kapung jadi nok suruh napok kekapunge tu, aku lukih demo duo ni naik lembu sapi. Lokasi latar belake kapung tu aku ambik pemandange di Kampung Awek, Besut iaitu kapung sahabat-sahabatku seperti Ismail, Shamsul, Abu Bakar, Nik Mahyidin, Saiful, Sani & ramai lagi hok mungkin aku terlepas sebut. Teringat maso sekoloh mulo bilo tengok gambar ni, hehehe."

TEKNIK SHADOWING

Assalamualaikum,

"Demo dale gamba ni aku sajo lukih sebagai latihe. Mugo lamo tok berlatih jadi nok mahirkan diri, aku 'try' lukih gambar ni. Nilah gambar hok aku bulih kemahire baru iaitu teknik 'shadowing' dale melukih. Alhamdulillah betullah oghe kato 'Practice Make Perfect'. Ado jugok kebenare ayat tu. Lepah lukih gambar nilah aku belajar koho-koho teknik 'shadowing' dale lukise. Alhamdulillah, kemajuan tu ado, hehehe."

RAJA HINDUSTANI

Assalamualaikum,

"Lagu soho ceghito ni 'Pardesi-Pardesi Jana Nehi' membuat aku melukih gambar ni. Hero Aamir Khan & Karishma Kapoor. Lagu sedih kakloh dan gambar ni pun aku lukih berdasarke saloh satu 'scene' dale lagu tu. Ceghito sikit pasal lagu ni Raja(Aamir) dio oghe sesok khijo dreba teksi jah. Aarti(Karishma) anok oghe kayo. Temung duo ni terpikatlah lalu jadi kasih. Nok nikoh pok hok tino pulok tok buwi. Mugo oghe kayo cekak nok wi anok ko oghe sesok."

"Tapi nikoh jugok dale pakso pun syarat hok tino dok denge pok dio. Raja tokse mugo dio nok duk rumoh sedighi. Gi maghi gi maghi Aarti keno pisoh jugok maso dio ngandung. Panje lagi ceghito, leloh aku ghoyak panje-panje. Tapi kesudohe baik semula lepah Raja wak lari anok dio. Lagu ni 3 versi dale ceghito ni. Aku nok nyanying pun takut jadi lagu dikir, hehehe."

BOYO OH BOYO

Assalamualaikum,

"Boyo ni aku lukih lepas tengok ceghito 'Black Water'. Kesoh boyo besar kheto make oghe. Tapi tok sedak mano ceghito tu. Jadi sebab nok 'try' lukih boyo nok tahu jadi ko dok mako aku lukih gambar ni."

"Tengok ko ngango mulut tu napok ado doh gayo boyo tapi tengok ko ekor tu napok po ekor cicok jah. Anok-beghanok dio doh tu. Tengok gambar ni aku teringat sokmo ko lagu dikir Boyo Darat nyanyian Nadieya & Ezrin. Lamo tok dengar semek duo ni nyanying. Mulo gak aku minak dooh lagu boyo darat ni. Siap ule 10 kali lebih so sesi, jadi dale saghi aku dengar 4 sesi maknonyo 40 kali lebih aku ule lagu tu, hehehe."

HE-MAN & THE MASTER OF UNIVERSE

Assalamualaikum,

"Gambar ghima ni aku 'try' jah lukih padahal aku tok panda pun lukih gambar binate ni. Idea aku lukih gambar ni sebab aku tengok cerito 'He-Man & The Master of Universe.' Cerito katung jame aku budok-budok mulolah tapi ule semula dale TV. Kito hok minak doh aku tengoklah. Jadi si 'He-Man' ni dio ado pegho ghima seko. Aku pun 'save' ghima dio tu dale 'memory' lalu aku pun lukih."

"Tapi tok seghupolah denge ghima 'He-Man' tu. Ghima dio besa lagi, paka kelubung atah palo. Aku tok gheti nok lukih kelubung dio tu jadi aku lukih ghima sajo. Aku hajat nok lukih 'He-Man' tapi tok ingat baju dio lagu mano, hehehe."

POKKO VS SESUMPAH

Assalamualaikum,

"Angguk pokko angguk, meh-meh nya nok patoh,
Duduk di kayu buruk saloh jupo nga oghe latoh.."

"Sebuoh lagu dikir barat nyanyian Fendi Aye Seramo pasa pokko ni. Jadi sebab lagu nilah aku lalu lukih pokko dale gambar ni. Lukih kokse kokde jah tok tahulah jadi ko dok."

"Maso lukih gambar ni aku mahir doh sikit guno 'mouse'. Toklah kekkok seghupo mulo-mulo guno wak lukih mulo, hehehe."

RUMAH, MOTOR & AKU

Assalamualaikum,

"Hehehe, gambar ni meme nakal. Gambar ni aku lukih pemandange depe tanggo rumoh aku. Jadi aku lukih oghe duk kak muto tu kononnyo akulah ado muto besar. Tapi cerito sebenar maso ni aku baru bulih naik muto abah aku wi muto Honda EX5. Disebabke aku tok minak mano muto EX5 ni mako aku lukih gamba muto besar. Muto besar tu pulok aku tiru model mene adik aku, hahaha."

"Sebab aku lukih oghe nga muto besar duk depe rumoh tu dale idea aku nok wi gambare aku ni ado muto besar pun tok nyoho dok kapung, rumoh kayu jah, hehehe."

ANTI JENAYAH

Assalamualaikum,

"Sesuai doh denge  tajuk sebab dale gambar ni aku lukih pegawai polis nok timbuk oghe jahak. Pah hok tino tu mangso jahak tulah konon-kononnyo gitulah idea asal aku, hehehe."

"Tapi gambar ni aku lukih sebab sebenarnyo di sekoloh aku cikgu sibuk dok kepeng budok suruh 'join' kelab cegoh jenayoh. Aku meme kughe doh bab-bab jenayoh ni. Jadi aku lukihlah gamba ni sebagai sokongan moral aku ni sahut seruan cikgu aku walaupun tok jadi ahli kelab tu, hehehe."

SUNGAI UNTUK AROHA

Assalamualaikum,

"Sungai untuk Aroha, maksudnyo lukise sungai tu aku lukih atah kertas lukise sebab adik aku Aroha mitok tulong aku lukih berkebetulan aku balik. Cikgu mitok keesokan pagi doh, male tu baru nok buat, nana jugok aku baru nok cari lukise, nok cari berus, cat lagi. Buat lebih kughe jah main nga mato ngatuk."

"Aku lukih pokok pun tok napok supo pokok. Tapi biarlah asal siap. Lepah siap aku pun 'scan' masuk dale komputer. Loni lukise asal tok tahu pah mano. Harak ado hok scan ni lah. Insyaallah ado maso aku nok 'try' cari semula lukise lamo-lamo (kalu adolah). Boleh buh dale blog ni, hehehe."

TSUNAMI, ANA & ENING

Assalamualaikum,

"Gambar ni aku lukih selepas peristiwa Tsunami melando tanggal 26.12.2004 kalu tok silak sebab maso tu aku lepah dengar berito drumoh Ponglong Kob mugo  drumoh aku takdok TV lagi. Supo kalo aku 'save' dulu dale 'memory' otok aku baru aku lukih semula."

"Kaitan hok tino duo oghe tu adolah saing aku di sekoloh iaitu Ana & Ening yang mano aku gambarkan karakter demo duo ni dale bentuk lukisan. Ana ni dio tegas sebab dio penolong ketuo pengawas di sekoloh aku jadi aku wak dio pulah lingo budok pah Ening ni pulok dio jenis 'slow' jadi aku lukihlah dio dok jale gayo melimba, hehehe. Jadi gabungan Tsunami, Ana & Ening mako terhasillah gambar ni, hehehe."

MULA BERKARYA

Assalamualaikum,

"Inilah lukisan hok mulo-mulo aku lukih guno mouse. Meme lucu aku tengok. Takdok gamok tengok. Tapi bulihlah koho-koho, kenal jugok gambar gapo."

"Idea nok lukih gambar ni maghi lepah aku tengok ado 'couple' dok 'dating' tengoh baruh kapung aku. Kambing tu pun ado dok mamoh rumput dekat 'couple' tu 'dating'. Aku pun 'save' pemandangan tu dale 'memory' aku, balik drumoh aku lukih atah kertas dulu. Jupo komputer aku pun lukih semula guno 'mouse'. Mako jadilah supo dale gambar ni, hehehe."