"Alhamdulillah syukur pado Allah Yang Maha Pemuroh lagi Maha Kayo. Allah izin aku lukih gamba pah poh dale blog ni. Jadi kali ni aku lukih gamba pahlawe kito iaitu dari komando GGK atau komando beret ija ye menjadi kebanggoe wargo tentero darat de jugok Angkate Tentero Malaysia."
"Puok ni meme dikenali nga imej beret ija pah ado palo ghima nga benet di lambe atah palo sebeloh kiri. Untuk rujuke bulih tengok dale gamba tu. Aku lukih gamba ni buke gapo sebab aku baru jah kelih drama Beret Hijau 13 episod, fuh meme mantaplah. Jadi melalui drama tu aku bulih tahu susoh sene hidup seoghe komando ni. Oghe kato komando ni latihe teruk memelah namo doh komando. Baso diolah latihe kenolah teruk. Sebab puok ni dio pikul amanoh menjago kedaulate negaro. Pasuke hok depe sekali tokkelah nok latih supo budok kadet. Aku mulo maso dale askar pun rekrut biaso jah baru tapi kito beraso po separuh mati doh hehehe. Kalu puok komando ni gak dok tahulah. Hanyo oghe hok pernoh ghaso jah tahu belah mano."
" Apopun oghe kato bagi aku puok ni tetap terbaik sebab buke seghemo oghe mampu bergelar komando (termasuk aku). 'Basic courses' pun berair mato doh samo telohlah hok lain lagi. Jadi sekali lagi aku ucap timo kasih pado wargo komando samo ado hok peceng doh ataupun masih berkhidmat jaso kalian Allah sajo layok membalasnyo.."
DATANGMU TIDAK DIUNDANG RAGU-RAGU SILA PULANG
KOMANDO 3X
Tiada ulasan:
Catat Ulasan