MASYA O MASYA

Assalamualaikum..

Alhamdulillah..Lamo bena aku senyap menyepi membowok diri hehe..Ni baru timbul pulok. Jadinyo mungkin ini gambar terakhir untuk tahun ini hok ado penerangan sebab lepah pado ni aku nok bubuh gamba sajo doh supayo senang untuk aku masuk jah gamba rajin sikit nok buko blog hehehe..

Jadi Masya ni sepupu aku sebenarnyo sajo aku lukih rupo dio dale bentuk kartun untuk menghiburkan hati aku yang telah lamo menyepi dari arena seni lukih ni hehehe..Wallahu A'lam!

KAMPUNG HALAMAN

Assalamualaikum..

"Alhamdulillah akhirnyo aku menyeroh kaloh nga kehebatan lukise ni. Niat aku nok kemah lagi tapi idea aku terhad doh untuk lukise ni (sebenarnyo malas hehehe..). Aku lukih gamba ni sebab lamo doh aku cito-cito nok lukih gamba pemandenge kawase kapung aku. ALhamdulillah akhirnyo berjayo jugok aku capai cito-cito aku tu. Kawase ni aku ambil kawase Kampung Bukit Cino Jalan Pasir Akar nok gi ko Jabi. Sukonyo raso bulih lukih gamba ni walaupun dok siap sepenuhnyo tapi aku anggap selesai doh ni. Sebab memori aku takdok kakah lain cumo hok ado pemandenge jah. Tu pun aye bapok tu aku wak bijok jah gi tamboh, hehehe"

JONAH HEX

Assalamualaikum..

"Alhamdulillah lamo bena dok temu dale blog ni tambohe duo tigo hari lepah aku sakit. Alhamdulillah tando Allah saye ko aku nok hapuh doso-doso lamo Allah wi sakit. Tapi takpolah aku tetap bersyukur atah segalo nikmat Allah buwi. Sakit deme pun merupoke nikmat Allah jugok dale bentuk kesakite."

"Terus ko gamba ni sebenarnyo aku baru jah jupo watok ni kebetule aku tengok ceghito mulo-mulo aku dok peghase lagi lamo-lamo lepah tu baru aku teringat Jonah Hex ni supo aku pernoh tengok. Lamo aku duk mikir baru aku ingat aku tengok watok dio ni dale cerito Batman hok kartun tapi maso tu Jonah Hex ni tuo doh."

"Aku cerito lebih kughe pasal Jonah Hex ni dio sebenarnyo manusio biaso jah keno sekso ko musuh dio sebab tu muko dio jadi gitu. Dio ni seoghe askar berpangkat Leftenan tapi disebabke dio nok balah dende ko jahak hok khenak ko dio nga anok bining dio lalu diburunyo musuh-musuh dio de dilupoke tugas  sebenar dio. Gitulah lebih kughe ceghitonya. Dio ni meme ditakuti musuh-musuhnyo disebabke perangai dio membunuh tanpo belas kasihe bersenjatoke kapok berbiso dio. So lagi dikatoke dio ni mampu berkomunikasi nga oghe mati bilo dio nok tahu sesuatu rahsio. Jadi gitulah setakat hok aku tahu. Akhirnyo aku pun lukihlah watok dio ni nga gayo aku sedighi, hehehe"

CINTA AZALI

Semenjak mula kita bersua
Bergetar rasa di dalam jiwa
Apakah ini tandanya
Ada janji antara kita

Setiap hari kita berdekatan
Rasa hangatnya kemesraan
Bila kita berjauhan
Gelora jiwa kerinduan

Kita bersama terus kembara
Jauh ke taman asmara
Di sana cinta berpadu
Menjadi satu

Demi cinta suci ini
Kurnia dari Ilahi
Biarpun ke lautan api
Sanggup diharungi

Memang sudah suratan azali
Kita dipertemukan di dunia
Sehingga kita kembali
Bertemu semula di syurga

KELAM

Assalamualaikum..

"Allahu Akhbar lamonyo dok 'update' blog ni. Guano ya jadi gitu nyah. Aku malah nok kecek banyok terik ni como nok ghoyaknyo perut seghabut sangat ghaso. Untuk teneke pikire aku mako aku lukihlah gamba ni nok luoh perasoe. Bolehlah.."

PERMAI DESA

Assalamualaikum..

"Alhamdulillah terimo kasih de semboh setio pado Allah Yang Maha Hebat ye teloh memberike keizine padoku bulih ngepoh dale ni. Kali ni aku lukih denge 'mood' nok ghayo. Comonyo aku ghaso sedih de sayu sebab bile poso nok habih doh. Tahun depe belum tetu temung. Sedihnyo ghaso nok pisoh nga bule hok penuh berkat ni. Buke gapo bule nilah pahalo bergando-gando walaupun amale samo di bule lain.."

"Jadi gamba ni aku lukih hasil impian & cito-cito aku satu maso nati nok bowok bining aku gi tengok keindohe kapung tempat aku membesar, pulok tu keno gi hari rayo huh meme torbaiklah! Hehehe"

MIGHTY JOE YOUNG

Assalamualaikum..

"Alhamdulillah..setinggi-tinggi kesyukuran aku lafazke ke hadrat Penciptoku Allahhu Robbil A'lamin. Aku poh pulok karya terbaru aku ni. Merujuk pado tajuk tu ionyo adolah tajuk cerito kisoh Gorilla besar namo 'Joe' nga awek namo 'Young'. Aku dok panda nok cerito banyok cumo gapo hok aku bulih kato cerito ni menghiburke. Supo kalo aku bilo terujo tengok cerito maghi selaluh modal nok lukih. Apo lagi aku lukihlah gamba ni. Tapi watok awek tu aku gati nga watok aku hehehe. Skala saiz dok berapo keno antaro aku nga gorilla tu tapi bulihlah gorilla tu napok aku duk lamba dio. Namo gorilla ni aku wi namo KUSINA, hehehe"

SHOTGUN

Assalamualaikum..

"Alhamdulillah syukur nikmat. Allah Maha Pemuroh lagi Maha Pengasihani. Diciptoke segalo nikmat untuk hambo-hamboNyo namun kebanyoke daripado hambo Allah jaghe bena bersyukur di atas nikmat hok Allah buwi. Toksoh kato mugo hok besa-besa, semaye pun malah nok sujud sebagai tando taat pado Allah. Pah belah manolah hidup nok berkat semaye pun dok lekat."

"Aku pehe de aku mengerti untuk diri sedighi, kalu sekironyo kito degil po'ok malah nok semboh Allah, malah nok sujud pado Allah, Allah dok rugi gapo pun. Allah Maha Kayo takdok nok rugi doh, tapi kito ni sesok mepeh harap ko sifat Maha Pemuroh Allah jah bulih hidup lagi. Kito agah pun harap ko Allah buwi jah, kayo pun Allah buwi, gedebe pun Allah buwi tapi kito banyok lupo atau wak lolok dok ingat anugeroh Allah tu. Sebab tulah Allah uji kito kade-kade supayo kito insaf, takut-takut nok kaba, nok sedar sapo kito hok sebenarnyo."

"Aku ya nok maghoh sangat buke gapo, kade-kade oghe sekeliling aku ni ramai hok dok kaba ke diri, kecek supo dok mati. Pah ngaku pulok nikmat hok dirasoi  itu milik diri sedighi padahal bulu romo soghak pun mingje hok Allah. Kalu kito nasihat ko, wak lolok tegur how celik butir mato selaluh gak cocoh biar daroh. Tapi takdok aghohlah aku ni diasuh nga sifat sabar. Huh, panah ghaso keno mandi ni. Kalu bule dok poso bulih jugok gomo air."

"Jadi tu mukoddimoh poh aku kali ni, sajo nok luwoh perasoe jah. Hehehe, takdok kaite pun nga gamba. Mungkin aku tengok cerito 'Black Hawk Down' menjadi punco aku lukih gamba tu, hehehe"

PERMATA INTAN DI LEMBAH HATI

Assalamualaikum..

"Alhamdulillah, bule poso nok habih pulok doh. Alhamdulillah berkatnyo bule mulio ni. Raso semeta sangat jah maso berlalu. Aku sangat gembiro poso tahun ni. Paling tene seomo hidup aku. Sebab paling utamonyo supo hok aku ghoyak sebelum nilah. Aku bulih baco banyok ayat-ayat Quran poso tahun ni. Tu ya jadi suko sangat tu. Jadi apo kaite nga gambanyo? Ado kaitenyo"

"Mulo-mulo sekali aku ngaji Quran dale satu pete. Pahtu sudoh siap ngaji tu aku bukolah blog ni sajo-sajo jah takdok niat pun nok lukih. Pahtu denge izin Allah aku bulih ilham nok lukih ketenange hati aku lepah baco Quran tu. Keno nga taiming suasano pete aku pun lukihla gamba ni. Ditamboh lagi aku dengar lagu Ahmadi Hassan bertajuk 'Permato intan di lemboh hati' apo lagi aku pun wak jadi tajuk poh kali ni. Pahtu aku baru mikir permato ni mugo bernilai pulok duk di lemboh hati mako aku pehelah Quran itu panduan kito yang bulih membersihke hati sebab tu dio mahal. Lalu kenolah nga suasano. Jadi aku pun semakin bersyukur pado Allah atah nikmat hok Dio buwi ni, Alhamdulillah.."

SEJUK BEKU

Assalamualaikum..

"Alhamdulillah..Maha Suci Allah Tuhan sekelian alam. Aku hok hino ni diizinkan lagi untuk ngepoh dale blog ni. Bule poso tahun ni aku beraso sedak sangat sebab aku bulih baco Quran denge istiqomah. Lepah so suroh so suroh aku baco. Tene sangat raso. Hati aku beraso sejuk nyame ibarat duk di kutub utaro jah rasonyo walaupun hakikatnyo aku dok sapa lagi denung. Dale dado raso takdok masoaloh pun, hile habih woh saghu, woh seghabuk perut."

"Meme nilah sebenarnyo nikmat Quran ye mulio ni. Pah so lagi aku raso sakit urat aku hile lenguh-lenguh setiap kali aku baco ayat Quran. Hebatnyo Quran ni seghemo ado. Kade-kade aku letih baco Quran beraso sega semula. Hok paling aku nengung sakit palo aku nga atah belake tekok ni pun kughe sakit doh supo mulo. Alhamdulillah, hebatnyo mukjizat Nabi Muhammad Sallallahu A'laihi Wasallam ni"(Selawat ke atas bagindo)..

"Jadi kaite nga gapo hok aku lukih nga hok aku ghaso ni sudoh jelas gapo hok aku ghaso aku terjemoh kembali dale bentuk lukise. Mako terhasillah gamba di atas ini, nyame, sejuk de beku."

LOGAN AKA WOLVERINE

Assalamualaikum..

"Sembah sujud dan lafaz kesyukuran ke hadrat Allah Subhanahuwata'ala. Pemilik segala isi langit dan bumi. Dialah Allah Yang Maha Kaya lagi Maha Pemurah teloh memberi izin kepadoku hambo ye hino dapat lagi mengepoh karya dale blog ini hasil anugeroh Allah jugok hok buwi ko aku sapa aku bulih lukih. Jadi sempeno bule ye mulio bule penuh keberkate ni, aku lagilah bersyukur teramat sangat Allah buwi peluwe aku temung poso lagi tahun ni, Alhamdulillah."

"Gamba di atah aku lukih hasil refleksi minda aku lepah tengok cerito 'X-Men The Origins:Wolverine'. Sajo jah nok nati mato ngatuk laye cerito dulu. Aku nok baghi panje pun takdok guno sebab cerito ni pun aku tengok setakat hok aku sedighi jah pehe, jadi nok hurai ko oghe rasonyo dok padelah. Apopun itulah hasilnyo bilo minda aku terpengaruh denge kehebatan si Logan ni lalulah aku koya pahtu lukih watok tersebut mako siaplah, sekian hehehe"

RAMADHAN 2012

Assalamualaikum..

"Alhamdulillah aku lafazkan kalimah syukur ke hadrat Allah Subhanahuwataa'la Tuhan Sekelian Alam kerno telah mengizinkan aku ye hino ini bulih temung poso lagi tahun ni, syukur sangat-sangat pado Allah. Sukonyo ghaso bulih temung poso pulok. Nilah peluwe aku nok tamboh pahalo sebanyok-banyoknyo. Alhamdulillah setakat ni aku doh peghabih baco so suroh dale Quran iaitulah suroh Al Baqarah. Loni duk sambung baco suroh Ali Imran pulok takpolah sikit-sikit baco lamo-lamo habislah. Niat aku bule poso tahun ni nok khate so Quran tapi dok tahulah de ko dok. Aku ake berusoho sebaik mungkin ke aroh itu InsyaAllah..."

GGK BERET HIJAU

Assalamualaikum..

"Alhamdulillah syukur pado Allah Yang Maha Pemuroh lagi Maha Kayo. Allah izin aku lukih gamba pah poh dale blog ni. Jadi kali ni aku lukih gamba pahlawe kito iaitu dari komando GGK atau komando beret ija ye menjadi kebanggoe wargo tentero darat de jugok Angkate Tentero Malaysia."

"Puok ni meme dikenali nga imej beret ija pah ado palo ghima nga benet di lambe atah palo sebeloh kiri. Untuk rujuke bulih tengok dale gamba tu. Aku lukih gamba ni buke gapo sebab aku baru jah kelih drama Beret Hijau 13 episod, fuh meme mantaplah. Jadi melalui drama tu aku bulih tahu susoh sene hidup seoghe komando ni. Oghe kato komando ni latihe teruk memelah namo doh komando. Baso diolah latihe kenolah teruk. Sebab puok ni dio pikul amanoh menjago kedaulate negaro. Pasuke hok depe sekali tokkelah nok latih supo budok kadet. Aku mulo maso dale askar pun rekrut biaso jah baru tapi kito beraso po separuh mati doh hehehe. Kalu puok komando ni gak dok tahulah. Hanyo oghe hok pernoh ghaso jah tahu belah mano."

" Apopun oghe kato bagi aku puok ni tetap terbaik sebab buke seghemo oghe mampu bergelar komando (termasuk aku). 'Basic courses' pun berair mato doh samo telohlah hok lain lagi. Jadi sekali lagi aku ucap timo kasih pado wargo komando samo ado hok peceng doh ataupun masih berkhidmat jaso kalian Allah sajo layok membalasnyo.."

DATANGMU TIDAK DIUNDANG RAGU-RAGU SILA PULANG

KOMANDO 3X

RUMAHKU SYURGAKU YANG DISAYANG

Assalamualaikum..

"Alhamdulillah syukurnyo aku ke hadrat Allah Yang Maha Pemuroh lagi Maha Pengasihani. Malunyo beraso ko Allah sebab aku wak banyok doso nga maksiat pun Allah izin lagi ngepoh dale blog ni. Timo kasihlah pado Allah. Kalu Allah dok izin gak toksoh kato nok ngepoh dale blog, nok nyawo pun tokleh. Mako wojiklah aku keno bersyukur pado Allah."

"Atah dasar itulah mako aku lukihlah gamba atah ni sebagai simbolik tando kesyukuran aku terhadap nikmat Allah. Kalu ikut meme dok terhitung banyoknyo nikmat Allah buwi pado aku tapi aku sekoda bersyukur hok mano bulih sebab setahu aku hok jahil ni kalu aku bersyukur Allah ake tamboh lagi nikmat hok ado doh, tapi kalu kufur gak wak lolok dok ingat nikmat Allah mako natilah azab Allah hok pedih, wanauzubillah.."

"Berbalik pado lukise tadi aku lukih gamba tu supo kato saknilah aku gambarke kesyukuran aku. Jadi dale gamba tu hok jate tu suami balik drumoh tengok isteri ado doh duk nati muko pitu, how meme bahagiolah beraso. Si isteri pulok napok suami balik gak gaduh loghak nok sambut. How teramatlah bahagio rumohtanggo belah ni mo. Soalnyo aku bulih ko temung hok belah ni? Nengung pulok aku nok guno minda mengkaji persoale ni."

"Ya Allah Ya Tuhanku Yang Maha Mendengar lagi Maha Mengetahui, kurniakanlah daku isteri yang solehah dan anak-anak yang soleh sebagai penyejuk mataku bila aku memandang mereka. Dan jadikanlah keturunanku orang-orang yang soleh dan solehah, amin.."

FIKIRAN HANYUT

Assalamualaikum..

"Alhamdulillahhi Robbil A'lamin. Syukur ke hadrat Allah aku dipanjeke usio bulih lagi ngepoh dale blog kesayenge aku ni. Huduh-huduh pun tetap aku saye sebab banyok kenenge hidup aku tercatat dale setiap poh hok ado dale blog ni."

"Jadi kali ni aku lukih dok tahu gapo motihnyo. Aku lukih dale keadaan palo otok kosong atau denga kato lain hanyut ikut nnitah lukih jah. Aku kade-kade ado jugok tiko palo hanyut disebabke hal-hal hok aku keno guno minda lebih sikit pado sekalo."

"Contohnyo taing bulih gaji mulalah minda aku kijo lebih nok guno kok mano pitih hok bulih tu, nok sedekoh ko atau nok belanjo gu-gu ko atau nok sipe dale akaun bank ko. Meme maso nilah palo ake ghaso senok-senok sapa so tahap jadi kosong ha maso tulah aku lukih ikut nnitah jah. Jadi hasilnyo pun ikut nnitahlah. Aku wi contoh jah tu taing bulih gaji tu buke fakta sebenar hehehe"

MISI BERJAYA

Assalamualaikum..

"Alhamdulillah syukurlah Allah Maha Pemuroh lagi Maha Penyayang. Maha Suci Allah dan Maha Sempurna setiap kejadian Allah. Aku bulih lagi ngepoh dale blog ni. Aku puye ni jadi gilo ko nok lukih suasano peghe pah ceroh. Dok tahulah bakpo. Duk beghaso kih baco buku PERAJURIT baru ni doh."

"Tengok gamba jah jadi nok lukih laluh. Baso diolah de jiwo lukih ni gak pate maghi idea mula gha nok lukih. Jadi aku pun 'on' komputer jalan terus! Hasilnyo mako supolah dale gamba datah ni. Wak ko terujo dooh sapa lukih muko lebih kughe jah. Tengok sekali po cino pun ado hehehe.."

DARAH SATRIA

Assalamualaikum..

"Kali ini aku nok cerito kesoh dale gamba ni. Takdok gapo hok istimewo cumonyo aku duk terbaco kesoh askar jame dulu hok terpakso tinggal bining gi masuk hute sebab ado operasi jadi aku maghi mikir kalulah keno ko aku sedihnyo beraso. Tambohe pulok kalu bining duk tengoh mengandung hadow koholah sedih. Ni raso nok tiok ni."

"Ehem apo pun aku sanjung tinggi pengorbane ayoh nga tokki kito jame dulu ye berjue sepenuh hati tanpo ado keluh kesoh walaupun terpakso meninggalke anok isteri. Kalu balik semula dale keadaan come supo sedio bulih tehe lagi. Banyokke nyo balik takdok sekerat putuh kaki putuh tange keno 'Bobby Trap'."

"Hanyo Allah Yang Maha Berkuasa membalas pengorbane de keperite wargo pahlawe ni. Aku amat hormati mereko ye sanggup berkorban demi negaro de oghe lain. Hok paling dok tehenyo askar-askar kito ado jugok hok balik sebagai jenazoh yang mulio meninggalkan dunio ini denge maruoh ye tinggi tanpo mengharapke balase di atah jaso ye diberike.."

"Al Fatihah untuk pahlawe kito ye gugur de syahid di mede perang!"

"Padelah dulu aku sedih berair doh mato ni, wallahua'lam"

MUSAFIR ALAM

Assalamualaikum..

"Alhamdulillah aku bersyukur pado Allah denge izinNya bulih pulok aku ngepoh dale blog ni. Jadi gamba ni aku lukih sebab nok 'try' lukih tanpo guno kale mace biaso aku buat. Oghe kato teh 'skill' barulah pulok. Hasilnyo jadilah supo dale gamba tu. Aku ngaku meme kekkok weh lukih dok guno kale ni ghekyok pettok gamba jadi. Tapi aku ejahlah sikit-sikit biar dok napok sangat ghate hok ghekyok tu panda-pandalah kito buat dio ke hehehe"

MEGHADAP KE LANGIT, MENUNDUK KE BUMI

Assalamualaikum..

"Syukur ke hadrat Allah, aku mampu lagi nok ngepoh dale blog dok tokoh aku ni. Panje bena tajuk poh teghik ni tapi ado sebaknyo. Kali ni aku lukih gamba langit nga bumi supo tajuk tulah. Motif gamba tersebut ialah simbolik antaro aku selaku hambo ye hino tunduk sujud pado Allah Yang Maha Gagah. Walau sehebat mano pun kito menesio atah muko bumi ni tapi kito tetap ake balik ngadak Pencipto kito jugok."

"Gamba langit tu aku lukih gambare kito ngadak ko langit bilo nok mitik doa nga Tuhe. Tapi bilo kito buak doso kito keno ingak Allah Maha Pengampun jadi bertaubatlah sungguh-sungguh iaitu taubat nasuha. Demikian pulok gamba bumi tu. Sebenarnyo tu gamba kawoh gunung berapi sebagai peringate pado diri aku sedighi igatlah kalu banyok doso Allah akan azab nga api nerako, wanauzubillah.."

"Cumonyo aku lukih untuk mengaitkan antaro langit de bumi ni samo-samo saling memerluke sebak keduonyo itu ado kesan saling berkaite kalu takdok langit kito dok tahu sapo pencipto kito. Pah pulok kalu takdok bumi kito dok sedar dari mano asalnyo kito, wallahhua'lam.."

MUSLIMAH COMEL

Assalamualaikum..

"Alhamdulillah aku teruske perjuange aku dale poh gamba-gamba dale blog ni. Aku lukih pah aku poh dale blog ni sebak tulah niat aku maso mulo-mulo wak blog ni mulo. Jadi aku lukih tanpo raso putuh aso sebak mugo hok aku minak jadi 'no problem' kato mat leh."

"Jadi kali ni aku lukih gamba seoghe muslimah denge takdok motif gapo pun. Lukih ikut nitah di palo jah. Nilah hasilnyo bilo aku lukih nga takdok semangat atau dale bahaso formalnyo MALAS. Tapi wak ko minak malah-malah pun lukih jugok. Bulihlah kiro daripado dok buat lasung hehehe"

KHUTBAH TIDUR

Assalamualaikum

"Alhamdulillah kali ni aku poh gamba maso aku semaye jumaat sakni. Meme ngatuk sangat-sangat mato aku sebaknyo mareng aku khijo 24 jam capo nga gati oghe. Mako hari ni teramatlah ngatuk butir mato. Jadi maso aku gi sejid tadi pun ngatuk dooh lalu sapa duo tigo kali ngail maso kotib baco teboh."

"Apo hok aku nok suko aku sengguk tu jeling kane jeling kiri gu lawe sebeloh pun ngail supo aku jugok hahaha aku beraso nok pecoh perut suko. Tapi harap ko atah sejid aku ok jugok suko takdok aroh sungguh jadi balik sejid tadi aku pun lukihlah gamba suasano atah sejid tadi hehehe"

ANGIN DI BUKIT

Assalamualaikum,

"Syukur pado Allah di hari ye mulio ni aku bulih lagi poh gamba dale blog ni. Terik ni aku poh gamba pemandenge di Scotland Yard (reko jah hehehe). Buke gapo aku puah duk sajo lukihlah gamba ni bele-bele teh 'skill' baru denge kato lain meningkatkan kemahire."

"Gamba ni aku lukih nga suasano berangin di atah bukit sebab aku raso panah dale bilik ni jadi aku pun buat keputuse nok wak gamba hok bulih menyejukke pandange. Mako terhasillah gamba ni, sejuk jugoklah walaupun peluh dok kering, hehehe"

BUKIT, LANGIT, AWAN & BURUNG

Assalamualaikum,

"Kalu de rajin gak aku ni rajin telajok dale so male bulih siap 2 lukise. Ghoyak tu 'time' rajin. Heh kalu maghi 'time' malah sebule takdok so lukise aku buat. Tapi gapo-gapo pun itu semuo hanyolah cobaan kato pendekar buje lapok, hehehe."

"Jadi gamba kali ni aku lukih sajo-sajo jah motih dio po kalolah pemandangan alam. Gamba bukit, langit, awan, burung. Tu jah hok aku panda lukihnyo. Kalu nok lukih lebih-lebih meme aku 'surender' dulu lagi sebab aku ni bukelah seorang pelukih hok mahir. Hanyo pelukih bele-bele suko sebab tu kebanyoke karya-karya aku dok beghapo jadi mano."

"Aku lukih bilo idea maghi. Ataupun bilo aku telajok bose pun bulih jugok aku lukih. Tapi aku pun heghe bakpo kalu 'time' bose aku lukih meme kemah (walaupun hudoh) banding nga aku lukih maso-maso santai. Aku duk kaji lagi loni tu bakpo bulih jadi gitu hem bakpo eh??"

SUMO PAINT

Assalamalaikum,

"Alhamdulillah aku masih diberi kesempakte untuk mengepos dale blog ini. Jadi kali ni aku baru lepah denga ceramoh Ustaz Azhar Idrus lalu maghilah idea aku nok lukih gamba ustaz. Jadi aku pun lukihkah. Siap-siap jadi supo hok ado ni. Aku lukih pun bele-bele 'test' kakah baru untuk lukih iaitulah 'Sumo paint'."

"Supo kalolah aku kalu tra hok baru meme wak lebih kughe jah tapi syukur jugok pado Allah bagi aku kigho jadi doh lukise ni walaupun dok berapo nok kemah. Lukise ketogeri ni aku buh dale kelah main-main sebaknyo aku buat dale mod percuboe. Tapi bolehlah hehehe.."

BOSAN AKA BORING

Assalamualaikum,

"Seghupo nga tajuk yang tersebut, mako itulah perasoe aku di kalo ini. Andai dikutuk syok sendiri aku terimo disebabke itulah hakikat sebena. Nok tido dok jenegho mako aku lukihlah gamba ni. Bele-bele ngatuk pun de lagi aku lukih."

"Sabik kato buke nyadak kato (walaupun keduonyo tidok bulih berbicaro) kalu de jiwo lukih ni gak kehe kok mano pun keno lukih jugok de aku bersyukur pado Allah Yang Maha Pemuroh lagi Maha Penyayang kerno Diolah hok buwi aku jiwo lukih ni de aku amat bersyukur padonyo. Terimo kasih Ya Allah Alhamdulillah.."

*Aku raso ngatuk doh ni nok tido dululah..

BURUNG TERBANG PAGI

Assalamualaikum,

"Alhamdulillah kali ni aku ado luwe lagi nok lukih gamba. Jadi aku pun sebelum nok lukih aku gi tubik lua meta konon-kononnyo nok cari ilhamlah hehehe. Lalu aku lenggok tengok datah palo bunyi burung terbe singgoh atah jula pokok. Aku pun ambil 'scene' tu sipe dale palo lalu aku pun masuk lukih dale komputer. Sudoh siap tu aku pun lok lamo dulu barulah aku 'upload' dale blog ni."

"Hasilnyo  seghupo hok ado nilah tapi aku lukih bele-bele malas mako hasil pun po jepuk keno ghembahlah hehehe"

KUBUR DISINARI CAHAYA BULAN

Assalamualaikum,

"Kullu nafsin zaa iqotul maut" maksudnyo 'setiap yang bernyawa pasti merasai mati' begitulah lebih kughe maksudnyo. Buke gapo aku sajo nok ingatke diri sendiri kade-kade lala duk keja dunio wojik jugok ingak ko mati jadi aku pun lukihlah gamba ni sebaga peringate.."

BAITI JANNATI

Assalamualaikum,

"Alhamdulillah syukur sangat-sangat pado Robbul A'lamin. Diolah Allah Tuhan yang sebena layok dipuji. Denge izin Dio aku berjayo melukih de meng'upload' gamba ni dale blog. Sukonyo raso. Gamba ni bagi aku adolah antaro hok terbaik kalu 'ranking' gak setakat ni nombor 1#."

"Sebaknyo gamba ini merupoke impian aku walaupun di luar lukise. Jadi aku beraso tene setiap kali aku kelih ko gamba ni. Meme inilah gambare lebih kughe matlamat hidup aku de oleh kerno itulah tujue gamba ini aku lukih. Gamba ni napok 'simple' jah tapi bagi aku nilai estetika tu tinggi. Aku mitok doa pado Allah agar impian aku seghupo hok dale gamba ni jadi kenyatoe insyaallah.."

SANTAI DI WAKTU PETANG

Assalamualaikum,

"Alhamdulillah, ghano kiro aku ni ghaik pah timbul. Buke gapo comonyo aku ni sibuklah konon-kononnyo sebab khijo. Tapi walaupun gitu aku teringak sokmo ko blog aku ni sunyi jah takdok kaba berito. Ha jadi ni aku masuk gamba nok kato baru dok jugok como aku sipe jah lepah lukih."

"Jadi gamba ni adik aku suruh lukih watok dio nok jugok ado dale gamba kih nyo dio tengok come pemandenge suasano baruh ado parit pulok. Dio kato sedaknyo kalu duk berehat bowoh pokok berangin jah beraso. Oleh kerano tahap kekoyaan dio tu semakin melampau mako aku pun lukihlah jugok takut setuk angin susoh nok bageh duk jauh pado kapung ni, hehehe"

RAMADHAN BULAN YANG SUCI

Assalamualaikum,

"Alhamdulillah bersyukur lagi ke hadrat Robbul A'lamin kerno dengan izin Dia aku bulih pulok ngepoh dale blog ni. Jadi tanpo membazirke maso hok ado ditamboh pulok jari aku lengoh maku aku ringkaske penerenge kali ini seringkasnyo. Gamba ni merupoke gambare aku di satu male dale poso tahun 2011 atau lebih tepat lagi bertempat di balasoh kapung aku jame dinding kayu mulo. Sebab aku lukih dok lain dok buke rindu kapung punyo pasal..Waaah rindunyo raso ko kapung!"

PUASA O PUASA

Assalamualaikum,

"Alhamdulillah kembali bersuo dale episod kali ni kecek ha poso. Sajo jah aku lukih sempeno bule poso tahun 2011 mulo ni. Jadi aku baru 'upload' sebab baru temu smula gamba ni cekak cari dok temu. Tapi Allah Maha Kayo jadi aku bersyukur pado Allah Dialah Maha Hebat jadi aku bulih temu smula gamba ni de bulih pulok buh sini (dale blog..)"

"Aku lamo doh cito-cito nok tra wak komik sedighi jadi ado kesempakte bulih jugok lukih. Keno molek berkat nga bule poso idea tu mari. Jadi gamba ni aku lukih mulo-mulo poso kalu dok salohlah pete tu bele-bele duk nati ko oghe be goghek, aku metek kopiuto dulu sebab idea ado takut de hile mmbe pulok nok bbulih. Jadi aku teringak jame kecik mulo rajin poso tapi meh-meh kain buruklah nok bulih ko buko poso tu. Wak ko teringak aku suko soghe pah aku pun lukihlah gamba ni biar ado woh lucu maso lukih tu."

"Alhamdulillah hasilnyo cukup untuk membuat aku tersengih soghe sebab aku raso puah hati lukih gamba ni. Kade-kade setiap kali aku tengok gamba ni aku jadi mace dok cayo bahawo akulah hok lukih gamba ni hehehe.."

INAI DI JARI

Assalamualaikum,

"Tajuk bunyi supo tajuk lagu, meme pun sebab aku ambil tajuk lagu nyanyian arwoh S Jibeng sebagai tema aku nok lukih. Jadi aku ni teremosilah disebabke dengar lagu tu mako datelah idea nok lukih gambare hok arwoh cerito dale lagu tu. Lalu aku pun sambil denga lagu sambil aku 'imagine' gapo hok aku nok lukih nati berdasarke kato-kato dale lagu tu. Lepah melaye jauh dok tahu pah mano mako aku pun lukihlah gambar tu."

"Mulo-mulo aku lukih hok tudung pink tu pasa diolah sumber utamo lagu tu. Aku buat dio tengoh paka ina biar keno nga tajuk lagu inai di jari maksudnyo di jari diolah inai ditepek. Lalu aku lukih pulok hok jong tepek inai tu selaku mok sedagho dio sebab dale lagu tu kato dikelilingi sanok sedagho. Seterusnyo hok tudung ija belake jong maka ina tu dok lain dok buke ummi hok tino tu nok tengoklah puteri dio paka ina."

"Sudoh aku lukih gambare dale bilik aku pun lukih dinding pulok tempat hok jate tu duk skokdeng. Hehehe sebenarnyo dio dok skokdeng como dio nok tengok buat kali terakhir wanita idame dio. Jadi hok jate tu aku lukih selaku lelaki ye disebut dale lagu tu. Gapo hok dio raso dio luoh dale bentuk lagu mako itulh lelaki tersebut. Ngelah sebagai mengemaske lagi gamba tu aku tamboh kipas angin bertujuan nok suruh ina cepat kering. Jugok aku tamboh khusi biar napok suasano majlis nikoh kahwin..Beres"

ORCA THE KILLER WHALE

Assalamualaikum,

"Ini namonyo 'Killer Whale' atau namo glamour Orca. Mugo ni dio digelar lagu tu sebab dio make anying laut mako banyoklah anying laut dibunuh olehnyo sebab itulah sajo makene dio. Oleh demikian kerana sifatnyo hok brehi membunuh tu mako digelarlah paus pembunuh atau bahaso kunonyo 'Killer Whale'."

"Jadi matlamat aku lukih ni sebab aku nok blaja lukih ike pauh spesih ni biar napok betuk hok sebenar. Tu pun aku raso dok jadi mano sebab takdok perincian hok aku buat iaitu aku lukih sekerat jah. Tubuh dio sepatutnyo aku lukih penuh tapi aku lukih dok guno panduan mako aku bulih lukih sekerat jah. Tapi aku akan usoho lagi sapa betul-betul mahir, insyaallah.."

ABI & UMMI

Assalamualaikum,

"Alhamdulillah aku raso berjayo lukih gamba guno gayo 'sketching' lepah tra banyok kali & hasilnyo adolah gamba di atas ini. Nok ghoyak banyok aku teraso sifat kemalasan berado pado tahap tinggi dale diri aku loning. Mako aku hurai gapo hok wojik jah hok sunak tu nati semula insyaallah.."

AMAL MALAYSIA

Assalamualaikum,

"Alhamdulillah..gamba di atas ini aku lukih di waktu ketiko aku melihat peristiwo Bersih dale internet lalu mato aku terlihat satu mugo menusio hok pakai serbo merun ado duk lilah-lilah depe sekali bahagie pertehene puok-puok Bersih. Oleh kerno pandange tersebut menarik minat aku mako aku pun menyiasat gapo namo oghe paka baju belah tu. Dan ternyato hasilnyo aku tahulah mugo itu disebut Unit Amal Malaysia di bawah naungan Ustaz Nasruddin."

"Jadi aku pun paka dok mikir panje lukih selalu gamba tu. Mako terhasillah gamba di atas de napok kemah jugok dari segi perincian baju cumo muko tu aku wak gayo katung sebab tu buke fokus utamo aku. Aku kene ko kala baju tu napok kemah merun supo nga unit 'para airbone' tentera darat, gempur wira!"

GHOST RIDER 2

Assalamualaikum,

"Hem tengok ko tajuk tahu doh nok ghoyak gapo jadi aku ni mudoh terpengaruh kalu de tengok ceghito hok sedak-sedak de saloh satunyo mugo ni oghe panggil Ghost Rider kesoh nombo duo. Aku minat sengoti ceghito ni jak hok nombo satu mulo lagi. Tapi maso tu aku tok maghi idea lagi nok lukih mugo ni. Tambohe sebab sokongan nyo aku tra 'software' baru jah nok lukih gamba ni iaitu 'Sumo paint'. Bagi aku samo jah cumo hok bezonyo kakah dio banyok lagi pado hok sedio."

"Secaro jujurnyo gamba ni aku buat ala kadar jah sebab butir mato tahap kritikal doh maso lukih. Sebagaimano hok aku hurai sebelum ni aku hanyo tra kakah baru sebab tu gamba ni dok 'detail' mano. Ikut hati aku meme aku nok khobek lagi biar lebih 'detail' namun apo ke dayo mato takdok gamok. Insyaallah ado maso aku nok reko pulok gamba baru ye lebih 'detail' pado hok ni hehehe"

DEVIAN ART & AKU

Assalamualaikum,

"Alhamdulillah sokmo aku jadi ghaso nok ucap sebab aku syukur Allah buwi aku peluang lagi bulih hantar gambar hok aku lukih dale blog wokyoh ni. Lamo bena ghaso dok 'posting' tapi takpo aku buat 'step by step' supayo tok serabut. Jadi sebut kato gamba ni aku lukih dale 'devian art' tapi aku ghaso nyo suko kokghe sebab aku lukih po budok baru blaja lukih, hehehe sebenarnyo sajo nok 'test skill' guno 'software' baru. Mako terhasillah karya tersebut. Aku malaslah tu kalu hasil po pokko gitu sebab kalu aku rajin dok jadi gitu mungkin lebih baik, hehehe"*

*'Backup' diri sedighi..

CROCODILE 2

Assalamualaikum,

"Wak ko nok ado jugok koleksi gamba boyo aku mako aku lukihlah so lagi gamba boyo. Tapi hok sedihnyo gamba ni dok jadi mano atas sebab aku lukih bele gaduh. Meme aku cayo kalu lukih bele gaduh mako karya pun jeng kegheng boh! Tapi takpolah aku fikir positif bahawo nga hasil gamba ni aku belaja dari kesilape bahawo lain kali kalu nok lukih kenolah nga penuh kesabaran, ketelitian, ketabahan & kecekalan mako hasil karyanya baru Ummphh!"

CROCODILE

Assalamualaikum,

"Gambar boyo ni merupoke gamba boyo versi baru dari versi asal hok aku lukih mulo. Sebabnyo versi ni aku guno 'software' baru. Jadi hasilnyo moleklah sikit banding hok mulo. Nok lukih gamba ni pun aku punyolah payoh raso sebab aku tok mahir mano bab-bab 'anatomi' nate ni. Tapi aku 'try' jugok wak rujuke melalui buku mewarno hok budok sekoloh rendoh sebab dale buku-buku ni banyok bentuk hok kito bulih belaja samo ado dari segi tubuh bade ataupun dari segi sendi tule. Jadi pah pado tu aku buatlah 'slow-slow' tapi bulih sekak palo jah 'body tok berapo jadi. Kesudohe aku 'cut' tinggallah supo hok ado tu. Keno belaja banyok lagilah jawabnyo, hehehe"

ELEPHANT 2

Assalamualaikum,

"Alhamdulillah, jadi ni dok habih lagi cerito hal gajoh. Lepah pado lukih gajoh hok dulu tu ni aku lukih pulok gajoh dari sudut lebih dekat lagi. Dari pandangan sisi terik ni. Gamba ni aku buat suasano waktu senjo di Afrika. Sebuk kato gajoh ni aku hajak nok jugok tengok hok 'live' tapi dok tahu bilo bulih jupo. Insyaallah ado keizinan dari Allah bulihlah jupo. Lepah pado ni aku nok 'try' lukih gajoh 'Mammoth' pulok. Iaitu gajoh jame T-Rex mulo, Insyaallah.."

ELEPHANT

Assalamualaikum,

"Alhamdulillah syukur pado Allah dengan izin Dia bulih lagi jupo. Amboi,lamo sungguh dok 'posting' dale blog ni. Sebelum lupo ucap selamak tahun baru 2012 dulu. Peje celik peje celik kaba dok kaba masuk tahun lain pulok doh. Cepat sungguh maso berlalu. Tapi takpo ado maso luang ni bulihlah ngepoh dale ni."

"Jadi gamba kali ni aku lukih gajoh di Afrika. Aku ambik suasano ni lepah tengok Astro Channel Animal Planet. Wak ko ghalik aku pun mari idea nok lukih gajoh. Jadi masih lagi nga konsep nate mako aku lukihlah gajoh. Jadi dok jadi pun hantam sajalah Labu!"